حواديت كاسبر Casper’s Tales
قصة كتاب
قصة كتاب
#سن٦_١٢
كان في بيت صغير وبسيط، ساكن جواه عيلة سعيدة
العيلة مكونة من أربع أفراد، بابا وماما وعلي وفريدة
علي وفريدة بيحبوا بعض جدًا وطول الوقت بيلعبوا كتير
كل واحد فيهم عنده لعب كتيرة محطوطة جوه صندوق كبير
كل واحد له أوضة لوحده ولكنهم بيقضوا أوقات كتير مع بعض
عندهم ألعاب كتير مشتركة وبيقعدوا يلعبوا بيها على الأرض
وفي يوم وهما بيلعبوا سوا، علي كسب اللعبة وكان مبسوط
قام يتنطط من سعادته، وخبط في المكتب، ووقع كتاب كان محطوط
علي مسكه عشان يرجعه فوق المكتب، ولكنه لقى عليه تراب
راح جاب منديل يمسحه، ولكنه لمح حاجة غريبه في الكتاب
لقى الكتاب بيلمع، وصفحاته بتتقلب بسرعة جدًا لوحدها
ووقفت على صفحة بيضاء، فيها جملة "أنا حزين" مكتوبة في وسطها
علي قال لفريدة، تعالي بصي الجملة دي مكتوبة من غير أي حاجة تاني
فريدة مسكت منه الكتاب، وقالتله إيه ده فعلًا هاتها كده وريهالي!
وبعفوية فريدة قالت، يا ترى مين كتبها، وهو ليه كده حزين؟
لقوا جملة جديدة بتتكتب، عشان محدش فتحني من سنين
علي وفريدة استغربوا، ولكنهم فهموا إن الكتاب بيحاول يكلمهم
فعلي قاله أنا اول مرة أشوفك هنا، احنا مش بنجيب كتب ونهملهم
الكتاب كتبلهم، أنا بقالي كتير مركون في صندوق كبير تحت اللعب
وكنت فقدت الأمل إن حد يطلعني وكنت خلاص مش قادر من التعب
لحد ما مامتكم طلعتني من أيام، وكنت حاسس إن أخيرًا حد هيقراني
ولكني لقيت نفسي محطوط على المكتب، ومحدش مسكني تاني
فريدة وعلي كانوا زعلانين، وحاسين بالضيق عشان الكتاب حزين
وفريدة بدأت تقوله خلاص مش هنسيبك وحقيقي احنا أسفين
رد الكتاب، ولكن أوراقي خلاص باظت من التراب وكلامها اختفى
وللأسف لما أوراق الكتاب بتبوظ وكلامها يتمسح ده مرض ملهوش شفا
فريدة وعلي قالوا للكتاب، احنا مش عارفين نساعدك دلوقتي ازاي؟
قالهم، أنا مش هتقدروا تساعدوني، ولكنكم تقدروا تساعدوا الكتاب الجاي
عاوزكم تقولوا لكل أصحابكم ميسيبوش كتاب مركون وميقروهوش
لو فعلًا اشتروا الكتاب، لازم ياخدوا بالهم منه جدًا وميهملوهوش
علي وفريدة وعدوا الكتاب، وبعدها حطوه على رف جوه أوضتهم
وبدأوا ينصحوا كل أصحابهم يحافظوا على الكتب لأنها ثروتهم
ومن يومها لو شافوا أي كتاب مركون، بيحاولوا يوصلوه للي يحتاجه
وبقوا دايمًا لما يشتروا كتاب جديد يقروه كويس ومن معلوماته يستفادوا
حواديت كاسبر Casper’s Tales
ليست هناك تعليقات:
إرسال تعليق